Аделегациа иалахәын 14-ҩык; урҭ рхыԥхьаӡараҿы иҟан «Кавказ абызшәақәа ркультура» аҟәша аиҳабы, адоктор Феҳми Ӡыба, амаӡаныҟәгаҩ Али Агрба, Аҭанур Аҟәысба.
Асасцәа бзиала шәаабеит ҳәа раҳәо, идикылеит Аԥсны аҭҵаарадыррақәа ракадемиа апрезидент Зураб Џьапуа. Аиԥылара аартуа уи иҳәеит «Аҭҵаарадырраҿы мшыннырцә инхо ҳашьцәа ирылшаша, ҳҵара излацхрааша акы ыҟоуп, ҳаргьы еиҳа иҳалшаша ыҟоуп. Шәҳақәгәыӷыр сҭахуп, ҳаргьы шәара ҳшәықәгәыӷуеит. Ҳара ҳаҭҵааҩцәоуп, ҳаимадарақәа бзиахар ахәҭоуп».
Зураб Џьапуа дазааҭгылеит академиа аусура, уи ашьақәгылашьеи аҭоурыхи, иазгәеиҭеит дара шазхиоу, иарбан хырхарҭазаалакгьы Ҭырқәтәыла инхо ҳашьцәа, аҵарадырра знапалаку аус рыцура. Аҭҵаарадырра знапы алаку, еиуеиԥшым аинститутқәа рхадацәа, аҵарауаа рылацәажәеит русура атәы, еиҳа реинырра, русеицура шыманшәалахаша алкаауа.
«Кавказ абызшәақәеи акультуреи рыҟәша» аиҳабы Феҳми Ӡыба иҳәеит: «Ҳара абра ҳахьааиз даара гәахәас иҟаҳҵоит, анаука аганахьала ҳаимадара ҳарҭбаар, ҳаибарбеиоит, хҳаибарҭәаауеит ҳәа сгәы иаанагоит. Ҳара иаҳхамышҭӡеит ҳаԥсадгьыл, ҳбызшәа, иаҳхашҭраны ҳаҟаӡам, убри азгәаҭаны ауп 2024 шықәсазы Диузџье изаартыз «Аԥсуа бызшәеи акультуреи рыҟәша». Ҳбызшәа, ҳкультура ҳашьҭахьҟа иааиуа абиԥара ирымаҳдарц ауп ҳусура ҳаиҭанеиааира хықәкыс иамоу»,– абас ихиркәшеит уи иқәгылара.
Зҭоурыхтә ԥсадгьыл иаҭааз Диузџьетәи аҳәынҭқарратә университет аҟазареи аҭҵаарадырреи рфакультет аделегациа иҵегьы ирҭаарааны иҟоуп Аԥснытәи аҳәынҭқарратә университет, Аԥсуа телерадиоеилахәыра. Агәра ҳгоит арҭ аиԥыларақәа наҟ-наҟтәи ҳаиашьара, ҳбызшәа , ҳнаука арӷәӷәара ишашьанахо. Иԥкымхааит ҳаибабара!

Наира Сабекиа