Аҳаирбаӷәаза 32 шықәса раахыс аусура еиԥҟьарны иҟан, ҩаԥхьа иаартын ҳазҭоу ашықәс лаҵарамзазы. Уи ареконструкциа Урыстәылеи Аԥсни еицынарыгӡо проектны иҟалеит.  

«Ари ахҭыс акырӡа аанагоит Аԥсни Санкт-Петербурги руааԥсыра рзы. Ҳара акыр ҵуеит ари аҩыза ахҭыс ҳазыԥшижьҭеи, уи анагӡаразгьы аус еицаауан. Иахьа иаҳҳәар ҳалшоит Урыстәыла Ахада ишиашоу ала Аԥсныҟа аҳаиреимадара абжьаҵаразы иҟаиҵаз анапынҵа нагӡоуп ҳәа, – иҳәеит агубернатор Алеқсандр Беглов. – Аҩганктәи аусуратә еимадарақәа шьҭарнахыс ӷәӷәала аҿиара  роуеит, иаауа атуристцәа рхыԥхьаӡара иацлоит.  Ҳара еицынаҳагӡараны иҟоу аусқәа рхыԥхьаӡараҿы иҟоуп аҩ-калақьк рҳаирбаӷәазақәа русеицура активтәра азура».

2023 шықәсазы имҩаԥысыз Петербургтәи жәларбжьаратәи аекономикатә форум аҿы Урыстәылатәи Афедерациа Ахада Урыстәылеи Аԥсни ишиашоу аҳаиреимадара рыбжьаҵара алыршаразы иҟаиҵаз адҵа аҳәаақәа ирҭагӡаны, Аҟәатәи Жәларбжьаратәи аҳаирбаӷәаза аиҭашьақәыргыларазы Аиқәшаҳаҭра рыбжьарҵеит.

Петербурги Аҟәатәи аҳаирбаӷәазеи ишиашоу аҳаиреимадара абжьаҵара аиҿкаара иалацәажәон 2025 шықәсазы имҩаԥысуаз Петербургтәи Жәларбжьаратәи аекономикатә форум аҿы, рашәаразма 19 рзы имҩаԥысыз агубернатор Алеқсандор Беглови Аԥсны Ахада Бадра Гәынбеи реиԥылара аҳәаақәа ирҭагӡаны.

Аҟәа итәаз  аҳаирплан ала иааит Азакәанԥҵаратә еизара ахантәаҩы Алеқсандр Бельски зхадараҿы дыҟоу Санкт-Петербург аделегациа. Урыстәыла Аҩадатәи аҳҭны-қалақь аҟынтәи ареис иаԥылеит Аԥыза-министр Владимир Делба зхадараҿы дыҟоу атәыла анапхгара ахаҭарнакцәа.

Аҟәеи Урыстәылеи рыбжьара аҳаиреимадара еиԥҟьан 1992 шықәсазы ақырҭуа-аԥсуа аибарххара аныҟала ашьҭахь.

Иахьа Аҟәатәи аҳаирбаӷәаза аҟынтәигьы иара убас имҩаԥгахоит Москваҟа, Нижни-Новгород, Ханты-Мансиск уҳәа ақалақьқәа рахь еиԥырҟьам ареисқәа.

 Санкт-Петербургынтәи ареисқәа мчыбжьык ахь ҩынтә, абри аихшанҵа инақәыршәаны имҩаԥыслоит.:

 Аҟәантәи аҳаирплан ыҵԥраауеит ашьыжь, 09:15 рзы, Санкт-Петербург итәоит  асааҭ 13:30 рзы.

 Шьҭахьҟа иҵыԥраауеит асааҭ 15:00 рзы, Аԥсны аҳҭны-қалақь аҿы итәоит асааҭ 19:15 рзы.