Раԥхьаӡа акәны, маи 1инаркны иааиԥмырҟьаӡакәа Имереҭиатәи акурорт аҟнытә Аҟәанӡа аныҟәара иалагоит ԥшь-вагонк зыцраҳәоу Урыстәылатәи афымцадәыӷба «Диоскуриа».

Абри атәы иҳәеит Ареспубликатә унитартә наплакы «Аԥснытәи аихамҩа» аиҳабы Арсоу Ҷыҭанаа. Уи иазгәеиҭеит, маи азы Аҟәеи Санкт-Петербурги адәыӷба шрыбжьало есымша, Аҟәеи Москвеи ирыбжьоу адәыӷба аусура ишалагахьоу, апрель 30 инаркны Шәачантәи Гаграҟа атуристцәа аалар шалшо атуристтә дәыӷба «Шәача» ала.

Аихамҩа иагыу-иабзоу аҟаҵара акәзар, есҽны аусурақәа мҩаԥысуеит. Абригадақәа аихамҩа ахьынӡа-наӡааӡо идрыцқьахьеит: иқәыргоит агәам-самқәа, иаҭахны иҟалар аҵлақәа хдырффоит. Маи инаркны нап аркхоит аестакадақәа зегьы ррыцқьареи рышәреи.

Абригада ҷыдақәа инарываргыланы, иара убас аимадаратә цәаҳәақәа ирыгу-ирыбзоу ҟарҵоит. Ауснагӡатә хадақәа ируакуп Аҟәеи Ԥсоуи рыбжьара 60 км/ сааҭ инаркны 80 км/ сааҭ аҟынӡа адәыӷбақәа рыццакыра ацҵара.

Ҷыҭанаа иациҵеит астанциа «Абааҭа» аиҭашьақәыргыларазы, Гәдоуҭатәи Аҟәатәи авокзалқәа рырҽеиразы аусурақәа ишырҿу. Асеиԥш иҟаз аусурақәа мҩаԥырымгеижьҭеи крааҵуеит. Иԥсахуп Аҟәатәи авокзал ахыбра, акәша-мыкәша иагыу-иабзоу ҟаҵоуп, иқәырҵоит ахаҳәқәа, иара убас ариаҵәаратә усурақәа ирҿуп.

«Маи азбжазы ҳалагоит Афонҿыцтәи авокзал адәахьтәи ахаҿра аиҭашьақәыргылара. Аԥснытәи аинвесторцәа ихдыркәшахьеит «Ԥсырцха» астанциа арҽеира. Иаарласны нап аҳаркуеит «Гагрыԥшь» астанциа.

Ҷыҭанаа иҳәеит аусурақәа зегьы шынарыгӡауа аихамҩа абиуџьет ала.

«Аҵыхәтәантәи ԥшьышықәса рыҩнуҵҟала апассаџьырцәа, аидарақәа рхыԥхьаӡара иахьацлаз иабзоураны ҳбиуџьет акырӡа ихаҭәааит, уи ала арҽеира-еиҭашьақәыргыларатә усурақәа наҳагӡоит. Абри аамҭа аҩнуҵҟала Аԥснытәи аихамҩа ахашәалақәа 10-нтәы рыла ишьҭыҵит, аусзуҩцәа руалафахәы акәзар – хԥеи бжакынтә», – иаҵишьит иара.