Ажурналистика азанааҭ аналысх еиҳагьы ибзианы еилыскаауа салагеит ауаажәларра рыҧсҭазаара иадҳәалоу азҵаарақәа рҭак аҟаҵара шаҭаху. Аҧснытәи аҳәынҭқарратә университет аҟны ажурналистика аҟәша аҟны сдыррарҳара сҽаназыск ауп еилыскаауа саналага сзанааҭ иамоу аҧҟарақәа, уи аҿы иаарҧштәу ахымҩаҧгашьа.
Ҳара ателехәаҧшрала ҳры­хәаҧшуеит аҳәаанырцәтәи ажурналистцәа, иаҳбоит урҭ имҩаҧырго адырраҭарақәа, насгьы лассы-лассы ҳрықәыӡбоит. Дара ржурналистика рмилаҭ аҷыдарақәа азеиқәмырхаӡеит. Ҳара ҳаҧсуа журналистика егьырҭ ирылазмырҩашьо акәны иҟазар ауп ҳаҧсуара. Иара лабҿаба ианыҧшлароуп аҧсуа иҷыдарақәа ҳәа азысыҧхьаӡоит, насгьы аҽазышәара аарҧштәуп аҧсуа журналистика аҧсышәа цқьала ицәажәаларц.
Аинтернет аҟны иаабоит аурысшәаҟынтәи аҧсшәахь еиҭагоу аинформациа. Уи ҳбызшәа даараӡа иаҧырхагоуп, ҳбызшәа ацқьареи аҷыдареи ацәнарӡуеит. Сгәы иаанагоит аинформациатә агентрақәа аиҭага ҟамҵакәа аинформациа иаразнак аҧсышәала ирыҩлар акырӡа иеиӷьхон ҳәа, схаҭа исҭахуп ус снапы аласкырц сзанааҭ.
Иара убас иазгәаҭатәуп аҧхьаҩ, ажурналист иусумҭа даднаҧхьаларц азы уи аинтерес аҵазар шакәу. Сгәы иаанагоит аҧсҭазааратә хҭыс згәылаку аматериал акырӡа аинтерес аҵалап ҳәа.

Алиона Гәымҧҳа,
ААУ афилологиатә факультет ажурналистика аҟәша
2-тәи акурс астудент