Зегьы раԥхьаӡа иргыланы, ҳара игәаҳҭеит шықәсқәак раԥхьа Урыстәылатәи Афедерациа Ахада инапынҵала ихацыркыз акредит ҷыда аҭара апрограмма аҳәаақәа ирҭагӡаны инагӡаз апроектқәа.

Иара убасгьы ҳаҭааит ахшаалыҵ ахьыҟарҵало азуад. Еиуеиԥшым адыррақәа рыла, иарбоу анаплакы аҭыԥантәи аџьармыкьа аҭахрақәа абжа хнаҩоит. Азауад аус аулоит аҳәаанырцәтәи аӡеи аҭыԥантәи аӡеи рхархәарала, ҳгәыӷуеит уи иабзоураны арахә анызҵо рхыԥхьаӡара рацәахап, атәылаҿы аферма ҿыцқәа ргылахап ҳәа.

Иара убас, ҳара ҳаҭааит аҩы ахьҭарҭәо азауад ҿыц. Апроект иабзоураны иҳамоуп аӡахәаҭра дуқәа. Ара иҭрыжьуа аҩы Урыстәылатәи аџьармыкьаҿгьы ирҭилоит, ҳгәы иаанагоит ихырҳагоу проектхап ҳәа», – иҳәеит Урыстәылатәи Афедерациа Аекономикатә ҿиара аминистр Аԥсны анапхгареи иареи реиԥылара ашьҭахь, ажурналистцәа данрыҿцәажәоз.

Решетников аԥснытәи абизнес аҩаӡара шеизҳаз азгәеиҭеит.

«Анаплакыҩцәа аԥеиԥш бзиа шрымоу рбоит, аицлабра ахьырацәоу урыстәылатәи аџьармыкьақәа рҿы аусура иазхиоуп, урыстәылатәи рколлегацәеи дареи акыр шықәса ԥхьаҟа аусеицуразы аиқәышаҳаҭрақәа рыбжьалоит. Арҭ зус здыруа, аарыхра знапы алаку, уаауп», – ҳәа иҳәеит аминистр.

Решетников игәаанагарала, ас еиԥш иҟоу хра злоу аԥышәа, Урыстәылатәи Афедерациа Ахада Владимир Путин адгылара зиҭаз акредит ҷыда аҭара апрограмма ҿыц ахацыркра аламҭалазы акырӡа аҵанакуеит.

«Иааиуа амзақәа рзы хықәкыс иҳамоуп аиԥш-зеиԥшу апроектқәеи урҭ рынагӡаразы алахәылаҩцәеи ралкаара», – ҳәа иҳәеит иара.