Август 11 азы Аԥсны Ахада Бадра Гәынба дидикылеит Урыстәылатәи Афедерациа Ԥсковтәи аобласт агубернатор Михаил Ведерников. Асас дидныҳәалауа, Бадра Гәынба гәахәарала иазгәеиҭеит Аԥсни Урыстәылеи русеицура активла ишҿиауа.

«Ҳара ҳаизыҟазаашьақәа ҳарҿиоит аусхкқәа зегьы рганахьала, ахырхарҭақәа зегь рыла. Раԥхьа иргыланы, арахь иаҵанакуеит арра-политикатә еизыҟазаашьақәа, анаҩсан аекономикатә, асоциалтә хырхарҭақәа», – иазгәеиҭеит иара.

Ахада иаҵишьит Урыстәылатәи Афедерациа арегионқәа рыбжьара Ԥсковтәи аобласт иҿиауа, еизҳауа ишыруаку. Ҷыдала иаликааит аешьаратә еизыҟазаашьақәа рзы Гәдоуҭа араион аҟны аиқәшаҳаҭра анапаҵаҩра, иара убас Ԥсковтәи аоблост арра-ҭоурыхтә музеи-ҳәырԥсарреи В.Г.Арӡынба ихьӡ зху Аибашьра Ахьӡ-Аԥша Аҳәынҭқарратә музеи рыбжьара аиқәшаҳаҭра. Ари ҳтәылақәа рыҩбагьы рзеиԥш ҭоурых ҳаҭыр ақәҵара аиқәырхара иацхраауеит.

«Ҳара еснагь Урыстәыла ҳавагылоуп, иахьа ҳарҭ зегьы иаҳҭаху аиаша еицаҳахьчоит. Сара агәра ганы сыҟоуп, ҳашҟа шәааирагьы наҟ-ааҟ ҳаизыҟазаашьақәа иҵегьы рырҿиара ишацхраауа», – иҳәеит Ахада.

Иара иганахьала Михаил Ведерников ҭабуп ҳәа иҳәеит асасдкыларазы, агәыцқьаразы, агәаартразы, акоманда азанааҭдырра ҳаракы азы. Уи иара убас агәра ганы дшыҟоу иҳәеит, географиала ишеицәыхароугьы Ԥсковтәи аобласти Аԥсни ирзеиԥшу шырацәоу.

«Раԥхьаҟа иргыланы, арахь иаҵанакуеит аекономика. Шәтәыла ашҟа иааҳашьҭуеит ашьаҵақәагьы, аторфтә уац, афымцацәаҳәақәа. Абри аусеицура арҭбааразы амч-алшара ыҟоуп. Избоит шәҳәынҭқарра активла аҿиара мҩа ишану, иара убас атуристтә усхкгьы», – иазгәеиҭеит иара.

Ведерников иажәақәа рыла, Ԥсковтәи аобласт Аԥснытәи отелиерцәа ирыднагалар алшоит асасааиратә бизнес азы аалыҵқәа.

«Ҳара ҳминистрцәа еицәажәахьеит ҭагалан абизнесуаа шәреспубликахь ишаауа иазкны. Саргьы сганахьала Аԥсны Аҳәынҭқарра анападкылаҩцәа аасыԥхьоит ҳашҟа инеирц», – иҳәеит иара.

Агубернатор иара убас иазгәеиҭеит аҿар русеицуреи, апрезиденттә грантқәа инарықәыршәаны еицаҳзеиԥшу апроектқәа рынагӡараеи рҵакы.