Аганқәа аҵарадырра ахырхарҭала русеицура иалацәажәеит.

«Апартниортә еизыҟазаашьақәа рырӷәӷәареи ихадоу ахырхарҭақәа рыла аусеицура   аҳәаақәа рырҭбаареи рзы ҳазҭоу ашықәс жәабранмзазы ҳусҳәарҭақәа рыбжьара аусеицуразы амеморандуми 2025 шықәсазы еицаҳзеиԥшу аусмҩаԥгатәқәа рплани ҳнапы раҵаҳҩит. Иарбоу аплан анагӡаразы активла аусура ҳалагахьеит.  Ишьақәсырӷәӷәоит иҳабжьаҳҵаз аиқәшаҳаҭрақәа рынагӡара мацара акәымкәа, урҭ рырҿиарагьы ҳшазхиоу. Ҳара аҵарадырра аусхкқәа зегьы рҿы шықәсырацәала аусеицуразы ҳаартуп», - инаҵшьны иазгәеиҭеит Сергеи Кравцов. Урыстәылатәи Афедерациа аҵара аминистр дара аҵарадырра аусхкқәа зегьы рҿы аусеицуразы ишаарту ирҵабыргит.

Иара иажәақәа рыла, аусмҩаԥгатәқәа 63 еиҿыркаахьеит, урҭ рыбжьара иҟоуп Аԥсны 27 школ рҟнытәи  540-ҩык инарзынаԥшуа арҵаҩцәа рзы аинтерактивтә рҵаратә цхыраагӡақәа рыла аусура иазку акурсқәа, иара убас  800-ҩык рҟынӡа злахәхо аурыс бызшәазы аолимпиада. Уаҟа аиааира згаз ацентр «Смена» аҿы имҩаԥысраны иҟоу аурыс бызшәеи акультуреи рфестиваль иалахәхар рылшоит.

 2025 шықәсазы изԥхьагәаҭоуп аҵарадырратә Аԥшьгарақәа, аԥснытәи астудентцәа рзы Жәларбжьаратәи аҵарадырратә школи ареспублика ашколхәыҷқәа рзы аурыс бызшәеи алитературеи рзы аолимпиадеи уахь иналаҵаны.     2021 – 2023 шш.Урыстәылатәи Афедерациа аҵара Аминистрра  Владимир Путин инапынҵала Аԥснытәи ашколқәа рахь арҵагатә шәҟәқәа раагара еиҿнакааит. Зынӡа иааган 228 556 екземплиар арҵагатә  материалқәа.

 Жәабранмза, 2025 шықәсазы адыррақәа рцентр «Машук» аҿы Аԥсны аҵараиурҭақәа рнапхгаҩцәа рзы раԥхьатәи аусмҩаԥгатә  «ПРО Образование» мҩԥысит. Сергеи Кравцов анаҩстәи аусмҩаԥгатә аиҿкаареи уи аусуратә программа аиқәыршәареи рҿы ацхыраара шыҟаиҵо иҳәеит.

Иаарту аҵарадырра Ацентр абазала Аԥсны аҽазыҟаҵарақәа ирхысит 630-ҩык инарзынаԥшуа арҵаҩцәа. Кравцов Аԥсны иҟоу Иаарту аҵарадырра ацентр аҟны 400-ҩык арҵаҩцәа разыҟаҵараҿы ацхыраара аҟаҵара ишазхиоу азгәеиҭеит. Иара убас, аусмҩаԥгатәқәа ирылоуп зцәажәара ԥку ахәыҷқәа рыхәшәтәразы аспециалистцәа рзы акурсқәа рымҩаԥгара.      

Иури Виаземски иԥылара

Ааигәа Аԥсны аҵара аминистр Хана Гәынбеи Москватәи аҳәынҭқарратә жәларбжьаратәи аизыҟазаашьақәа Ринститут (Ауниверситет) (МГИМО) апрофессор, ателедырраҭара «Умницы и Умники» автор, уи амҩаԥгаҩ Иури Виаземскии еиԥылеит.

Аԥсны аҵара аминистр Хана Гәынба Иури Виаземски бзиала шәаабеит ҳәа иалҳәеит. Ҳара гәахәара дула иҳадаҳкылеит Аԥсныҟа шәаара. Шәбара ҳаигәырӷьоит.  Шәара, абар акыр шықәса инаиԥынкыланы имҩаԥыжәго ателепроект ахшыҩзышьҭра аҭаны ҳахәаԥшуеит. Ари апроект аҟыбаҩ злоу аҿари абаҩхатәра злоу ашкол аҵаҩцәеи рцәыргаразы аҵанакуеит.  Ари аамҭа зегьы иалагӡаны шәпроект иабзоураны иаарԥшын хыԥхьаӡара рацәала аҟыбаҩ злоу ахәыҷқәа. Уи, аиашазы, акыр зҵазкуа усуп ҳара ҳзы», - ҳәа илҳәеит Хана Гәынба. Лара гәахәара дула иазгәалҭеит сынтәа Аҟәатәи абжьаратә школ №2 аҵаҩы Нестор Ҭарба апрограмма «Умники и умницы» аҿы зеиӷьаҟам ала итәыла ахьӡала дшықәгылаз, аиааирагьы шигаз.

«Аԥсны аҵара Аминистрра ԥшьышықәса ҵуеит ателеолимпиада алахәхаразы ашколхәыҷқәа азыҟарҵоижьҭеи. Сынтәа аиааира игеит ҳџьынџьуаҩ, Аҟәатәи аҩбатәи абжьаратә школ аҵаҩы Нестор Ҭарба. Уи ҳҳәынҭқарра ахьӡала қәҿиарала адырраҭара дахьалахәыз, уимоу аиааирагьы ахьигаз лымкаала ҳаигәырӷьоит, ҳизгәдууп ҳарԥыс», – иазгәалҭеит аҵара аминистр Хана Гәынба.

Иури Виаземски, ахәҭакахьала, аҵара аминистр адкылара бзиазы иҭабуп ҳәа леиҳәеит.  Иури Виаземски иажәақәа рыла, ареспублика аҟынтәи шықәсык аҩныҵҟа апроект иалахәхарц зылшо рхыԥхьаӡара иацҵоуп — хҩык рҟынтәи ԥшьҩык рҟынӡа.

«Урыстәыла Ахада Владимир Владимир-иԥа Путин игәазыҳәароуп ари — Аԥснытәи ашколхәыҷқәа ралахәхара», иҳәеит амҩаԥгаҩ.