Маи 10 азы Владимир Путин Кремль диԥылеит Аиааира амшныҳәа зхы алазырхәырц Москва инеиз Аԥсны Ахада Бадра Гәынба.

В.Путин: Ҳаҭыр зқәу Бадра Зураб-иԥа!

Шәбара даара сеигәырӷьоит.

Исҭахуп ҩаԥхьа Шәареи Аԥсны жәлар зегьи ирыдысныҳәаларц аныҳәа – Аиааира Амш. Иацы аусмҩаԥгатәқәа зегьы шәхы рылашәырхәит. Аԥсны жәлар зегьы иаҳзеиԥшу Аиааира аҟны уаҩы илаԥш зықәшәаша алагаламҭа ҟарҵеит. 55 нызқьҩык инареиҳаны иалахәын, рыцҳарас иҟалаз, 17 нызқьҩык инарыцны иҭахеит, афронт аҟнытә изыхнымҳәит. 23-ҩык ироуит Асовет Еидгыла Афырхаҵа ҳәа ахьӡ ҳаракы, иара убас хҩык – Ахьӡ-Аԥша аорден аҩаӡарақәа рыхԥагьы.

Иахьа ҳаизыҟазаашьақәа шьақәгылоит аидгыларазы 2014 шықәсазтәи аиқәышаҳаҭрала, иаԥҵоуп аиқәышаҳаҭра-зинтә шьаҭа ӷәӷәа. Иҟоуп аус зыдулатәу, ҳәарас иаҭахузеи, апроблемақәа еснагь ирацәоуп. Шәҿаԥхьа ауснагӡатәқәа рацәаны иқәгылоуп. Жәаҳәарада, Хадас шәаналырх ашьҭахь Аԥсны жәлар реизҳазыӷьаразы лҵшәабзиала аус жәуп ҳәа ауаа  шәықәгәыӷуеит.

Ҳара ҳганахьала ҳазхиоуп аекономикаҿгьы, агуманитартә усхкаҿгьы аусеицура ацҵара:  зыӡбахә сымоу аҵареи агәабзиарахьчареи роуп. Ҳәарас иаҭахузеи, атуристцәа рхыԥхьаӡара азырҳара зегь рыла ҳацхраалоит – иҳаҩсыз ашықәс азы урҭ рхыԥхьаӡарагьы маҷмызт. Ҳақәгәыӷуеит, ҳазну ашықәс азы ианеиҵаха бжь-процентк рыла иазҳап ҳәа, иҟалоит еиҳахаргьы. Издыруеит, даара акырӡа шрыҵаркуа алогистика, аҳаиртә баӷәаза. Абарҭқәа зегьы ҳрылацәажәап.

Б.Гәынба: Идуӡӡаны иҭабуп, ҳаҭыр зқәу Владимир Владимир-иԥа!

Ҭабуп ҳәа шәасҳәоит абарҭ амшқәа рзы Аџьынџьтәылатә еибашьраҿы Аиааира Дуӡӡа иазку аусмҩаԥгатәқәа схы рыласырхәыртә алшара ахьсоуз азы. Ҳара ҳзы ари ахҭыс хҭыс ҷыдоуп. Ари иаҳзеиԥшу ҭоурыхуп – ҳзыхӡыӡаауа ҭоурыхуп.

Шәара, иҵабыргыҵәҟьаны, даара ииашаны иазгәашәҭеит: зхыԥхьаӡара рацәам милаҭк раҳасаб ала ҳлагаламҭа акырӡа шаҵанакуа, убрахь иналаҵаны ҳара ҳазгьы. Еилаҳкаауеит ари изыхӡыӡаалатәу, ихьчалатәу ҭоурыхуп.

Рыцҳарас иҟалаз, ҳаамҭазтәи аҭагылазаашьақәа раан аҭоурых аҵакы аларҟәра рҽазыршәоит. Аҭоурых аиқәырхара аганахбала Шәара иҟашәҵо зегьы ҳара ҳзы акыр иаԥсоуп. Абри инамаданы, азин сышәҭ ҭабуп ҳәа шәасҳәарц: абарҭ ахҭысқәа аусмҩаԥгатәқәа аҽрылахәра ҳара ҳзы аҵак ду амоуп.

Урыстәылеи Аԥсни реизыҟазаашьақәа ирыҵаркуа акәзар, урҭ ӷәӷәала аҿиара иаҿуп. Владимир Владимир-иԥа, аԥхьа иҳамаз аиԥылараҿы шәара ирышәҭаз анаԥынҵақәа зегьы ирласны, насгьы ианаамҭаз инагӡан.

Ҳара ҳзы даараӡа акырӡа аҵанакуан аинфраструктуратә проект – 32 шықәса аус зымуцыз аҳаир баӷәаза аартра. Иахьа Урыстәылатәи Афедерациеи Аԥсны Аҳәынҭқарреи ҳаирла реимадара шьақәыргылоуп. Иара убас атәанчаҩцәа рыцхрааразы, аныҟәцагатә ршаҳаҭгақәа рыҭаразы, ԥасатәи аиԥылараан ишәаҳҳәаз, рганахьала иҟашәҵаз анапынҵа хадақәа рынагӡара иаҿуп.

Аԥсны жәлар хаҭала Шәара, Урыстәылатәи Афедерациа ажәлар ҷыдала ҭабуп ҳәа шәарҳәоит ҳреспублика, уи ашәарҭадара, ҳадгьыл аҿы аҭынчра аиқәырхара шәшырзыҟоу азы.

Ахҭыс схы иархәаны, Владимир Владимир-иԥа, сара сыхьӡала, Аԥсны жәлар рыхьӡала ааԥхьара шәысҭоит ианышәзыманшәалоу аамҭазы Ҳреспублика шәаҭаарц. Гәык-ԥсык ала ҳашәзыԥшуп, ҳгәыӷуеит иҟаҳҵаз абри ааԥхьара шәыдышәкылап ҳәа.

В.Путин: Иҭабуп идуӡӡан, гәахәарала исыдыскылоит. Аамҭа атәы шәареи сареи нас ишьақәҳаргылап.

Б.Гәынба: Иҭабуп ҩаԥхьа, иҭабуп аиԥыларазы.